Яна ж пераклала на беларускую мову творы шматлікіх аўтараў розных эпохаў і куткоў свету ад Скандынавіі да Новай Зеландыі, ад абедзвюх Амерык да Ірана, Індыі і Японіі. Да прыкладу, тры нумары ў «спеўніку» інспіраваныя паэзіяй Заро Уайл, былой танцоркі, якая піша па-ангельску ў Францыі ды мае беларускае паходжанне.
Спяваюцца словы нямецкага дадаіста і пачынальніка «гукавой паэзіі» Х'юга Байля, прадстаўніка «чорнай паэзіі» з Кубы Нікаласа Гільена, загучала «Аліва» Федэрыка Гарсіі Лёркі ды шмат іншых адметных вершаў. Усяго ў трэк-лісце 24 кампазіцыі агульнай працягласцю 40 хвілін.
— Вольга падала ідэю заняцца гэтым матэрыялам летась падчас фэсту Pradmova ў Варшаве. Спачатку я зусім не ўяўляў, што можа атрымацца. Але паступова ўвайшоў у ролю дзіўнаватага дзіцячага барда з маленькай гітаркай. Далучыў вакальны квартэт з самога сябе таксама. То бок, вырашыў зрабіць усё па-хатняму, аскетычна і лаканічна, але вынаходліва, каб у кожнай песні мелася свая цікавостка, і каб яны звязваліся міжсобку, — гэтак Віктар Сямашка апісвае працэс.
— Альбом атрымаўся вельмі разнастайным, дзе спалучыліся лірычнае і бунтарскае, іранічнае і ўдумлівае. Я вельмі ўдзячная Віктару, які пагадзіўся на гэтую авантуру. Як можна праспяваць хайку або танка, і, увогуле, нерыфмаваныя вершы? Гэта выпрабаванне яшчэ тое! Мне хацелася, каб у дзяцей (і дарослых) была магчымасць і ў музычным плане мець нешта эксперыментальнае і авангарднае, з элементамі какафоніі і джазу, што пашырала б іхны музычны гарызонт», — дзеліцца ўражаннямі Вольга Гапеева адразу па першым праслухоўванні.
Са «Сьпеўнікам багоўкі» можна пазнаёміцца на платформе Soundcloud. А першая беларуская анталогія нерыфмаванай паэзіі для дзяцей дасяжная праз сайт выдаўца Skarynapress.com.
прэс-рэліз VS&C°/ав